lanog

MGA BOLUNTARYO ALANG SA ELECTION 2010

Ang Parish Pastoral Council for Responsible Voting (PPCRV) naga-awhag sa matag parokya nga mangita ug mga boluntaryo alang sa umaabot nga Election 2010.

Alang niini, gihangyo na sa Padre Kura ang tinugyanan sa Youth sa atong Parokya nga mopahigayon sa pag-recruit og mga boluntaryo. Ang “minimn” nga gikinahanglan sa atong parokya (alang sa mga presinto sa Booy 20 lamang ka boluntaryo, apan mas maayo kon makakuha kitag mas daghan pa niana aron aduna kitay mga reserba nga boluntaryo. Daghang salamat!

GINAGMA’YNG KATEKESIS

Karon, moadto una kita sa No. 601 kay mao kini ang naghatag sa “Outline” sa atong pagahisgotan karon. Giiingon diha nga

Ang Credo nagpadyag og lima ka buhat sa makaluwas nga sakripisyo ni Cristo: siya gisakit, gilansang, namatay, gilubong, ug nanaog sa mga minatay.

Busa, kining atong pagtuon karon motuki niining lima ka buhat ni Cristo ubos sa lima ka tema:
• Una, atong hisgotan ang pasiunang bahin sa Krus, ang Timaan sa Makaluwas nga Gugma;
• Ikaduha, atong tan-awon ang Panglantaw ni Cristo bahin sa Kasakit ug Kamatayon (giunsa man niya kini pagsabot);
• Ikatulo, atong hisgotan ang Mga Kinaiya sa Iyang Kasakit ug Kamatayon;
• Ikaupat, atong tan-awon ang Lawom nga Sangputan sa Kaluwasan ug Pagkausab; ug
• Ikalima, atong hisgotan ang Pagkunsad ni Cristo ngadto sa mga Patay.

Atong unahon paghisgot ang pipila ka pasiunang kasayuran kalabot sa Krus.

I. ANG KRUS: TIMAAN SA MAKALUWAS NGA GUGMA

Sa No. 598 sa atong Katesismo

Gisumada ni San Pablo ang Ebanghelyo sa pag-ingon: “Si Cristo namatay tungod sa atong mga sala sa Kasulatan… gilubong… gibanhaw sa ikatulo ka adlaw sumala sa Kasulatan” (1 Cor 15:1-5). “Among gipadayag si Cristo nga gilansang, usa ka kapangdulan sa mga Judio ug kalibugan sa mga Gentil, apan alang niadtong gitawag, ma Judio siyag ma Gentil, si Cristo mao ang gahum sa Dios u gang kaalam sa Dios” (1 Cor 1:23-24).

Alang kang San Pablo, ang labing importante nga mensahe sa Ebanghelyo mao nga “si Cristo namatay alang sa atong mga sala sumala sa Kasulatan” (1 Cor 15:3; cf. CCC 601).
• Busa, ang kasakitan ug kamatayonni Cristo dili gayyud maisip nga walay-pulos ug subo lamang nga hitabo.
• Diha sa iyang sulat ngadto sa mga taga-Epeso, si San Pablo miingon nga ang kasakitan ug kamatayon ni Cristo nagtabang hinuon kanato sa “hingpit nga pagsabot, uban sa tanang mga balaan, unsa kalapad, kataas ug kahabugon ug kalawom ang gugma ni Cristo, ug nasinati nato kining gugmaha labaw sa tanang kahibalo” (Eph 3:18-19).
• Dugang pa, ang mga kasakit ug pag-antus sa inosente nga Cristo nagbutyag kanato- sa paagi nga walay laing makahimo – unsa ka sautan ug ka ngil-ad sa sala ug ang iyang gahum pagpadangat sa kawad-on, sa mga kasakit, kagutom, ka-way-alamag, pagkadunot ug kamatayon.
• Gawas pa niana, sa tiilan sa Krus nasinati usab nato ang hilabihan ka mapasayloon nga Gugma sa Dios diha kang Cristo Jesus.

Busa, tulo ka mga butang ang gipakita sa Krus: gipakita ang gugma ni Cristo, ang ka ngil-ad sa sala, ug ang ka mapasayloon sa Dios diha kang Cristo. Maoy hinungdan nga importante kaayo nga masabtan nato ang Krus.

Sa No. 599 sa atong Katesismo, gipasabot ang tukma gayod nga kahulogan sa kasakit ug kamatayon ni Cristo didto sa Krus, Giingon diha nga

Si Cristo nagluwas kanato dili lamang tungod kay nag-antus siya sa lawas kondili tungod sa iyang hingpit nga gugma sa iyang Amahan ug kanato, nga iyang gipakita diha sa iyang mga kasakit ug kamatayon alang kanato.

Angay masabtan nato pag-ayo nga dili lamang ang mismong akto sa kasakit ug kamatayon ni Cristo ang nagluwas kanato.
• Kon ang akto sa pagpasakit ug pagpakamatay mao raygikinahanglan sa pagluwas kanato, nganong dili man ang mga kawatan ang makaluwas kanato, nga gilansang man usab sila sa krus?
• Kana tungod kay dili lamang ang mismong akto sa kasakit ug kamatayon ni Cristo ang nagluwas kanato. Ang kamatuoran mao, nga naluwas kita pinaagi sa hingpit nga paghalad ni Jesus sa iyang gugma ngadto sa iyang Amahan ug alang kanato, usa ka gugma nga hangtud sa kamatayon.
• Ang nakapalahi ni Cristo sa duha ka kawatan nga gilansang usab sa krus mao ang hinungdan sa iyang paglansang. Samtang ang mga kawatan gilansang tungod sa ilang dautang binuhatan, si Cristo gilansang tungod sa iyang gugma sa Amahan. Kining gugma nga hangtod sa kamatayon mao ang nakaluwas kanato.

Busa, ang Krus wala magtudlo kanato nga dili gayod kalikayan ang pag-antus ug kahuyang.
• Mao kining hunahunaa ang gipahimuslan sa pipila aron maka-panglupig sila sa uban.
• Ang gipasabot sa Krus mao ang kadako sa gugma ni Cristo alang kanato, nga dili gayod mausab bisan pag ilansang siya sa Krus.

Busa, kadtong gihisgotan nato ganina nga duha ka hunahuna mahitungod sa kasakit ug kamatayon pulos sayop. Sayop ang pagpangita og mga kasakit, apan sayop usab ang paglikay niini. Ang insakto mao nga maningkamot kita sa paghigugma sa Dios, ug kon molambigit kinig mga kasakit, andam unta kita nga modawat sa maong mga kasakit.